Dirk Kock-Rohwer

Sehr geehrter Präsident! Leve Kolleginnen un Kollegen! Bruukt wi en nie’e Gesetz för dat Föddern vun de plattdüütsche Spraak in Sleswig-Holsteen? Oder beter: Wat doot wi in uns Land för den Erholt un dat Ünnerstütten vun de plattdüütsche Spraak? Plattdüütsch is een Spraak mit Geschicht, mit Literatur, mit Theoter un mit Alldag. För vele Minschen in Sleswig-Holsteen is Platt en Deel vun ehre Identität. Vun dorher is dat goot, dat wi hüüt hier in Landdag doröber un op Platt reden köönt – velen Dank, Volker, för dat Plattdüütsche jüst even. Schutz un Erholt vun de nedderdüütsche Spraak sünd in de Lannsverfaten vun Sleswig-Holsteen verankert, Nedderdüütsch is ok in de Europäische Charta vun de Regional- un Minnerheitenspraken nöömt. Wi hebbt dat jüst even höört: Dat Lännerzentrum in Bremen warrt föddert. Wi hebbt en Zentrum för Nedderdüütsch in Leck un in Mölln. Wi stütten den Nedderdüütschen Bühnenbund un genauso de Nedderdüütsche Medienplattform. Wi höört dat dorin, dat wi jeden Dag von Klock veer bit half fief dat Niede ut den Dag in Radio Apenen Kanal Kiel hören köönt. Un veles mehr warrt föddert, vun’t Sass Wöörbook bit to Ünnerrichtsmaterialien. Dat Föddern fangt in de Kitas an, denn dor lehren sik de Spraken ganz licht. Dat geiht in 55 Modellscholen wieder mit över 4.000 Schölers, de dorbi sünd. Dorto gehöört ok dat Utbillen vun de Lehrkräft, wat mööglich is an de CAU un de EU-Uni in Flensburg. Ok dat Ünnerstütten vun Inrichten för öllere Lüüd gehöört (Dirk Kock-Rohwer) dorto, denn jüst dor is de plattdüütsche Spraak ganz wichtig, dormit se sik so’n beten to Huus föhlt. Jüst wenn se an Demenz erkrankt sünd, hölpt de plattdüütsche Spraak ganz gewaltig. (Vereinzelter Beifall BÜNDNIS 90/DIE GRÜNEN) Dat allens steiht ok in den Bericht Fortschreibung des Landesplans Niederdeutsch un noch veles mehr. Deshalb is dat richtig un wichtig, dat wi dat in Utschuss noch mal beschnacken doot un uns dat noch mal genau ankieken köönt. Ik wöör seggen: Wi sünd op en goten Weg. Dorüm is uns Andrag richtig. Dat Land föddert, wo Berief besteiht, un wi sekert, wat wirken deit. Aver Platt mutt ok spraken warrn. 50 Perzent geevt an in de Ümfraag vun 2016, dat se Platt schnacken köönt, un över twee Drüddel dorvun, dat se goot Platt schnacken köönt. Wenn ik mi hier in Huus ümkiek, weet ik nich, ob wi de 50 Perzent erreichen doot, aver wi köönt ja an arbeiden. 87 Perzent seggt, se köönt Platt goot verstahn, un dat is ja mal wichtig. (Vereinzelter Beifall BÜNDNIS 90/DIE GRÜNEN, FDP und SSW – Beate Raudies [SPD]: Jo, dat kann ik!) Deshalb schull sik jeder an sin egene Nees faten un sik truen, dat ene oder annere Mal ok Platt to schnacken, dat to bruken un dat ok noch goot to wiesen, dat wi dat köönt un dat dat to SleswigHolsteen höört un ok to uns, de wi hier de Politiker sünd un op de man genauer henkiekt. In mien Jöögd hebbt unse Öllern mitenanner Plattdüütsch schnackt, mit uns Kinner aver Hochdüütsch. Wi schullen anstännige Düütsch lehren, dormit wi kene Nadele in de School hebbt. Un hüüt mööt wi dat umdreihen un dat Plattdüütsche mehr stärken. Dat steiht ok in den SPD-Andrag, aver wi bruukt keen nie’e Gesetz, sünnern wieder dat Ünnerstütten dör den Landdag; dat föddert wi in uns Andrag. Platt höört to uns, un wi sorgt dorför, dat dat ok so blifft. – Velen Dank. (Beifall BÜNDNIS 90/DIE GRÜNEN und CDU)