Volker Nielsen

Sehr geehrter Herr Präsident! Leve Kollegen! Uns plattdüütsche Spraak is dör de Europäische Charta vun de Regional- un Minnerheitenspraken schützt un hett hier in’t Land Verfassungsrang. De Bericht vun de Landsregeren över de Fortschriebung vun den Lannesplaan Nedderdüütsch ut Juni 2026 leggt Tüügnis af, wat allens maakt warrt – un dat is bannig veel. Düsse Bericht warrt nu in twee Utschüsse behannelt. Plattschnacken is faste Deel vun uns sleswig-holstenisches Levensgeföhl, Heimat Sleswig-Holsteen, Land twüschen Nord- un Ostsee, uns Modderspraak is Platt, un dat kümmt vun’t Hart, dat is Tohuus ween. (Beifall CDU, BÜNDNIS 90/DIE GRÜNEN und SSW) Artikel 13 leggt fast: Dat Land schützt, föddert un pleegt uns plattdüütsche Spraak. – Dör düssen hogen Rang hett dat Land in den letzten Johrteihnten männigmal un jümmers woller wiest, dat de plattdüütsche Spraak schützt, föddert un pleegt warrt. As Bispele much ik nennen: In Fachgesetze, Erlasse un Verordnungen för Kinnertagesstätten un Scholen is de Vermittlung vun dat Plattdüütsche, de Geschich un Traditschoon fastleggt. In Kitas un Grundscholen warrt sungen, leest un schnackt. Dat Konzept för de plattdüütschen Modellscholen löppt. Ok dat plattdüütsche Theoter op Laien- un op Profiniveau is lebennig. De Hochscholen in Kiel und Flensburg leisten ehren Deel. De Landdag hett den Nedderdüütschen Biraat mit Vörsitt dör de Präsidentin inricht, de Födderer vun de Plattdüütsche Spraak ut ganze Land kaamt männigmal in düssen Biraat tosamen un leggt fast, wat wo maakt warrt, um Platt to föddern un to erholen. De Zentren för Nedderdüütsch in Leck un Mölln, dat Lännerzentrum Bremen, alle sünd düchtig to Gang, lokal, regional un överregional. (Beifall CDU, BÜNDNIS 90/DIE GRÜNEN und SSW) Ik faat tosamen: Uns plattdüütsche Spraak is dör de Europäische Charta schützt un hett hier den hogen Verfassungsrang. Landdag un Landsregeren sett siet Johrteihnten düssen Verfassungsopdrag um. Vele Kommunen, Inrichten, Verene un Ehrenamtler möht sik Dag för Dag, uns Modderspraak in de Öffentlichkeit un in den Alldag to halen, un hebbt dorbi Erfolg. (Beifall CDU und BÜNDNIS 90/DIE GRÜNEN) Jedeen, de Platt schnackt, ob hier oder irgendwo in’t Land, hett sin Andeel an dat Holen vun uns Modderspraak. So is keen Bedarf för en Extra-Gesetz dor, wi dat vun den Plattdüütschen Raat för Sleswig-Holsteen im März 2026 un vun de SPDFrakschoon im April 2026 vörslaan warrt. Un so be ik den Landdag, unsern Andrag för dat wiedere Schützen, Föddern un Plegen vun uns Plattdüütsch totostimmen. – Velen Dank för’t Tohören. (Beifall CDU, FDP und vereinzelt BÜNDNIS 90/DIE GRÜNEN)