Dr. Anna-Konstanze Schröder

Leif Fru Präsidentin! Leif Inwåhners in Mäkelborg-Vörpommern! Wi hebben uns Verfåtung alltiet ok in Plattdüütsch hatt. Dorüm sech ik dor ’n bäten wat œewer up Platt. Dei Verfåtung barcht dat Fundament för uns demokratische Regerung. Dorin is upschräwen, woans wi in uns Gesellschop alltauhop läwen süllen. Dor sünd dei Rechte un dei Plichten för de Börgers und Inwåhners fast måkt. In Artikel 3 is schräwen: „De ganze Staatsgewalt geiht von dat Volk ut.“ Dat heit, de Lüd, de Börgers kören de Gesetzgäbung – dat is de Landdach, åwer ok de Kreisdach, de Stadtrat orrer de Gemeindevertretung. Un de Gesetzgäbung is „an dat Grundgesetz für die Bundesrepublik Deutschland un an de Verfåtung von dat Land Mäkelborg-Vörpommern bunnen“ – dat is in Artikel 4 upschräwen. De Gesetzgäbung måkt de Gesetze, de dörchsettende Gewalt un de Rechtspräkung möten sik dor an fasthollen. Dor is tauierst dat Volk – de Lüd –, denn de Landtag un denn dat Regieren, Verwalten und de Rechtsspräkung. Trüch tau Artikel 3 von de Verfåtung, dor is ok tau läsen: „Parteien un Börgerbewägungen helpen mit, dat Volk sick sinen eigen politischen Willen billen kann.“ Un dat is bannig interessant: Parteien sünd nie nich de Regierung, ok nich de dörchsettende Gewalt, ok nich de Gesetzgäbung orrer de Rechtsspräkung. (Beifall vonseiten der Fraktionen der SPD, DIE LINKE, BÜNDNIS 90/DIE GRÜNEN und FDP) Parteien sünd een Mœglichkeit von de Lüd tau’n Besinnen œwer de Probleme von uns Tiet. Wohrhaftig is, dat jedeen Inwåhner in Mäkelborg-Vörpommern sien eigen politische Meinung finnen möt. Een Partei möt helpen. Anner Mœglichkeiten sünd Börgerbewägungen orrer Vereinen orrer een Runden Disch orrer wat anners. Uns Verfåtung gifft jedeen nich bloots dat Recht, den Landdach tau küren. Jedeen hett ok de Plicht, sik een eigen politisch Willen tau billen. Dei Verfåtung is Ordnung för uns Gesellschåp – dat is upschräwen. Jedeen möt dat in sienen Olldach ok läwen. Dat is as mit de plattdüütsche Språk. In uns Verfåtung is schräwen: „Dat Land steiht för de plattdüütsche Sprak in un bringt ehr Pläg’ vöran.“ Nu is dat de Upgåf von jedeen Börger, dat ok tau schnacken. Plattdüütsch is nich bloots een lütt bäten Folklore för de Fieer up’t Dörp an een sünnigen Sünndach tweimål in’t Johr. Dat is nich bloots wat för Projekten un Fördermittel. Keen een Regierung möt de plattdüütsche Språk pläägen, wenn dei Lüd dat nich schnacken. Denn man tau: Kopp rut ut’n Nacken un Plattdüütsch schnacken! (Beifall vonseiten der Fraktionen der SPD, CDU, DIE LINKE, BÜNDNIS 90/DIE GRÜNEN und FDP) Plattdüütsch deit Not in’n Olldach. Un politische Diskussion deit Not in’n Olldach – beids, un nich bloots jümmers mit dei sülwen Lüd schnacken von de sülwig Telegram-Grupp, ok mal mit Lüd, de dat allens anners verståhn. De Wür’ von de Verfåtung ok tau läwen, dat is dat Recht, åwer ok de Plicht von jedeen Börger. De mihrsten Lüd hebben Plattdüütsch nich tau hus orrer in de Schaul lihrt. Sei verståhn dat, åwer sei schnacken dat nich. Jedeen kann dat lihren, in’n Kinnergoorden, in de Schaul un ok in de Volkshochschaul un mit Frünnen. De mihrsten hebben ok dat nich lihrt as Kinners, ehr eigen politisch Willen tau hebben, dorœewer tau schnacken, åwer ok jedeen kann dat lihren. Un uns Verfåtung is dat Fundament dor tau. (Beifall vonseiten der Fraktionen der SPD, DIE LINKE, BÜNDNIS 90/DIE GRÜNEN und FDP)